Leysasøgurnar hava gingið í fleiri vikur, men nú er skiftið alment. Aalborg Håndbold boðar frá, at 24 ára gamli hoyvíkingurin kemur til felagið á fríari flyting, tá sáttmáli hansara við týska stórfelagið THW Kiel gongur út næsta summar.

– Við Eliasi fáa vit ein spælara í heimsflokki, sum seinastu árini hevur verið ein lyklaspælari bæði í THW Kiel og á føroyska landsliðnum, sigur Martin Larsen, liðleiðari hjá Aalborg Håndbold.

Hann nevnir serliga teknikkin, spælfatanina og evnini hjá Eliasi at vinna nærdystir. Eisini hevur føroyingurin fleiri ferðir víst, at hann torir at taka ábyrgd, tá dystir skulu avgerast, sigur Martin Larsen.

Elias sigur sjálvur, at Aalborg var hansara fyrsti prioritetur, tá møguleikin fyri einum skifti tók seg upp. Málið hjá felagnum um at vinna Champions League hevur eisini havt týdning fyri avgerðina.

– Eg gleði meg at verða partur av einum spennandi hópi og vóni at kunna hjálpa felagnum at vinna fleiri heiti, sigur Elias Ellefsen á Skipagøtu.

Elias spældi við H71, áðrenn hann fór til svenska IK Sävehof í 2020. Í 2023 skifti hann til THW Kiel. Í 2024 varð hann kosin »Young Male Player of the Year« av altjóða hondbóltssambandinum, IHF.

Farna kappingarár gjørdist hann toppskjútti hjá THW Kiel við 150 málum í 22 dystum í týsku Bundesliguni.