Sambært kommununi kann uppskotið kosta Tórshavnar havn umleið sjey milliónir krónur í mistum inntøkum um árið.

Lógaruppskotið varð lagt fyri løgtingið 30. september av landsstýrismanninum í vinnumálum og skal eftir ætlan til viðgerðar í løgtinginum 20. oktober.

Sambært uppskotinum skulu skip hjá Strandfaraskipum Landsins, verjuskip, vaktar- og bjargingarskip og havrannsóknarskip, sum landið eigur, sleppa undan at rinda havnargjald, brúgvagjald og vørugjald til kommunalar havnir. Lógin skal eftir ætlan koma í gildi 1. januar 2027.

Tórshavnar havn og Strandfaraskip Landsins gjørdu í 2005 eina skrivliga avtalu um vøru- og skipagjøld fyri skip í innanlands sigling. Sambært fundarskránni fær Tórshavnar havn í dag umleið sjey milliónir krónur um árið í havna-, brúgva- og vørugjøldum frá Strandfaraskipum Landsins. Verður lógaruppskotið samtykt, missir havnin sostatt hesa inntøkuna.

Kommunan vísir eisini á, at lógaruppskotið ikki hevur verið til hoyringar, og at eingin fráboðan ella kunning er komin til kommununa um málið.

Í fundarskjølunum verður harumframt víst á, at eitt nærum einsljóðandi uppskot varð lagt fram í 2009 av sama landsstýrismanni, tá sum fiskimálaráðharra. Tá snúði uppskotið seg tó bara um havnargjøld. Sambært uppriti frá táverandi Innlendismálaráðnum vóru álvarsligir løgfrøðiligir trupulleikar við uppskotinum, og tað kundi verða mett sum ognartøka eftir grundlógini. Uppskotið varð tá tikið aftur áðrenn fyrstu viðgerð í løgtinginum.

Havnanevndin viðgjørdi málið fyrr í dag og tók undir við tilmælinum frá stjóranum í Tórshavnar havn um at senda málið víðari til býráðið.

Eyka býráðsfundurin byrjar klokkan 16.30 í býráðssalinum.