Lesandi í Føroyum skulu kunna vinna meira við síðuna av lesnaðinum, uttan at lestrarstuðulin verður skerdur.

Tað er endamálið við einum lógaruppskoti frá Bárði á Lakjuni, landsstýrismanni í útbúgvingarmálum, sum Mentanarnevndin nú hevur latið Løgtinginum álit um.

Øll nevndin tekur undir við uppskotinum, sum hækkar inntøkumarkið fyri mótrokning í lestrarstuðlinum úr 20.000 upp í 30.000 krónur um mánaðin.

Inntøkumarkið hevur verið tað sama síðani 2012, og tað merkir, at lesandi í dag kunnu vinna munandi minni, áðrenn stuðulin verður skerdur, enn tey kunnu eftir nýggju reglunum.

Broytingin gevur lesandi størri møguleika at arbeiða við síðuna av útbúgvingini, serliga í frítíðini og í summarfrítíðini.

Kostar landskassanum 700.000 krónur

Sambært uppskotinum verður mett, at broytingin fer at kosta landskassanum umleið 700.000 krónur í 2027.

Talan er um eina av fylgilógunum til fíggjarlógaruppskotið fyri 2027.

Ráð Teirra Lesandi á Fróðskaparsetrinum hevur eisini verið í Mentanarnevndini og lagt síni sjónarmið fram undir nevndarviðgerðini.

Nú Mentanarnevndin hevur latið sítt álit, skal uppskotið aftur til viðgerðar í Løgtinginum.

Verður uppskotið endaliga samtykt, verður inntøkumarkið hækkað við 50 prosentum.

Talan er um løgtingsmál LM-032/2026.