Hvat verður í roynd og veru gjørt við tilráðingarnar, sum Útnorðurráðið ár eftir ár samtykkir og leggur fyri Løgtingið?

Tann spurningin reisir Uttanlandsnevndin í einum nýggjum áliti um tilráðingarnar frá Útnorðurráðnum í 2025.

Nevndin vísir á, at hetta hevur verið ein afturvendandi spurningur seinastu árini.

Tí vil ein samd nevnd nú hava eina meira skipaða mannagongd, sum tryggjar, at Løgtingið fær at vita, hvat landsstýrið hevur gjørt við tilráðingarnar.

Frágreiðing skal fylgja við á hvørjum ári

Uttanlandsnevndin mælir til, at tá føroysku limirnir í Útnorðurráðnum leggja nýggjar tilráðingar fyri Løgtingið, skal landsstýrið samstundis lata eitt yvirlit yvir, hvussu tilráðingarnar frá árinum fyri eru viðgjørdar.

Har skal millum annað standa, hvussu landsstýrið hevur fylgt tilráðingunum upp, og hvørjar ætlanir eru um at seta tær í verk.

Nevndin nevnir sum dømi, at tá tilráðingarnar frá Útnorðurráðnum fyri 2026 verða lagdar fyri Løgtingið, skal eitt yvirlit frá landsstýrinum fylgja við um, hvat er gjørt við tilráðingarnar frá 2025.

Sambært nevndini fer hetta at gera orðaskiftið í Løgtinginum meira ítøkiligt og geva tingfólkunum eitt betri grundarlag at viðgera tilráðingarnar.

Uttanlandsnevndin hevur áður fingið kunning um, hvussu landsstýrið arbeiðir við tilráðingum frá Norðurlandaráðnum. Nevndin heldur, at sama skipan eigur at verða nýtt fyri Útnorðurráðið.

Trygd og samstarv í Útnorðri

Útnorðurráðið er samstarvsfelagsskapur millum Løgtingið, Inatsisartut í Grønlandi og Altingið í Íslandi.

Á ársfundinum í Ilulissat í august í fjør samtykti ráðið tvær tilráðingar og eina yvirlýsing.

Millum málini hevur verið samstarv um trygd og verju í Norðuratlantshavi og verju av týdningarmiklum undirstøðukervi.

Ráðið samtykti eisini eina yvirlýsing, har heitt verður á parlamentariskar felagsskapir um at stuðla Grønlandi og grønlendska fólkinum.

Øll nevndin tekur undir

Uttanlandsnevndin hevur viðgjørt málið á tveimum fundum og hevur eisini havt fund við Bárð á Steig Nielsen, landsstýrismann í uttanríkis- og fiskivinnumálum.

Ein samd nevnd tekur undir við uppskotinum um tilráðingarnar og mælir Løgtinginum til at samtykkja tað.

Álitið er dagfest 9. november 2026.

Tað eru Jørgen Niclasen, Bjarni Hammer, Sámal Petur í Grund, Súsanna Bertholdsen og Hermann Samuelsen, sum hava lagt uppskotið fyri Løgtingið.

Málið er løgtingsmál nr. 023/2026.