Suðuroyartunnilin verður eitt mál, sum fer at fylla nógv í politikkinum í næstum. Arbeiðið er komið so mikið langt nú, at haldførismetingar eru gjørdar um, hvat tað fer at merkja fyri fíggjarlógina komandi nógvu árini. Tað sigur Aksel V. Johannesen í samrøðu við Sosialin.
– Og sjálvur haldi eg, at tað sær rímuliga fornuftugt út, sigur Aksel V. Johannesen, løgmaður.
– Sjálvandi hevur Suðuroyartunnlin stóran týdning fyri suðuroyingar fyrst og fremst, og at tryggja framtíðina hjá Suðuroy, men eg haldi eisini, at um vit hyggja eftir útrokningunum, sum eru gjørdar, so er tað heldur ikki heilt býtt fyri fíggjarlógina at gera ein Suðuroyartunnil. Men tað er tann størsta einstaka íløgan í føroyska samfelagið sum nakrantíð er gjørd, og tí hevur tað eisin stóran týdning at fáa eisini breiða semju um tað millum samgonguflokkar og andstøðuflokkar, og tað er ein politiskur fylgibólkur, og eg eri øgiliga optimistiskur um, at tað fer at eydnast at fáa eina breiða semju um at fara undir at gera ein Suðuroyartunnil – millum allar flokkar í Løgtinginum, heldur løgmaður.
Ætlanin er at tað arbeiði er komið so mikið langt, at tað verður ein fundur í politiska fylgibólkinum í august og so vónar løgmaður, at tað ber til at leggja eitt uppskot fyri Løgtingið í hesum árinum.