B68 skrivar soleiðis í kvøld:

B68 hevur sett 53 ára gamla toftamannin Arnbjørn Danielsen sum høvuðsvenjara hjá B68 fyri komandi 3 árini. Talan er um fulltíðarstarv.

Arnbjørn hevur nógvar royndir í fótbólti. Er uppvaksin í B68, men sum vaksin hevur hann skift ímillum at leikt við B68 og B36. Hevur íalt leikt 7 ár við besta liðnum hjá B68 og 7 ár við B36. Við B36 vann hann m.a. 2 meistaraheitir, í 1997 og 2001. Við B68 bleiv tað til m.a. 2 bronsumerkir í 2000 og 2003, og 2 ferðir vann hann 1. deild við B68, og harvið uppflyting, í 2005 og 2007. Arnbjørn er skrásettur fyri 8 landsdystir.

Seinnu árini hevur Arnbjørn nomið sær fótbóltsvenjaraútbúgvingar. Í 2022 fekk hann prógv sum UEFA-A venjari og í 2025 fekk hann prógv í Danmark sum UEFA Elite Youth A venjari.

Eisini hevur hann fingið sær nógvar royndir sum venjari, fyrst sum ungdómsvenjari hjá B36 í fleiri ár, síðani sum venjari hjá 1. deild hjá HB í 2023, og í 2024 og 2025 var hann høvuðsvenjari hjá ungdómsliðum í Danmark. Í ár hevur Arnbjørn verið høvuðsungdómsvenjari hjá KÍ.

“At sleppa at venja B68 er tað stórsta fyri meg, sum venjara - og ikki minst sum toftamann.

Málið er tvíbýtt:

Fyrsta málið er at koma uppaftur í Meistaradeildina sum skjótast.

Samstundis skal B68 framtíðartryggja seg til toppin av føroyskum fótbólti.

Eg gleði meg eisini at arbeiða saman við núverandi dugnaligu ungdómsvenjarum. Har vit kunna menna leikarar til framtíðina hjá B68”

Við Arnbjørn sum høvuðsvenjara komandi 3 árini, ynskir B68 at leggja stóran dent á at menna egnar leikarar. Umframt at verða høvuðsvenjari hjá besta liði felagsins, skal hann eisini saman við høvuðsungdómsvenjaranum gera menningarætlanir fyri ungu leikararnar, leggja venjingar til rættis og vera við til venjingar.

Hjartaliga vælkomin Arnbjørn, skrivar B68 í kvøld.