Øll føroyingaliðini í bestu donsku hondbóltsdeildini hjá monnum vóru í leiki í dag. Harímillum var ein føroyingauppgerð.

Óli Mittún var toppskjútti hjá GOG við níggju málum upp á 10 málroyndir, og einum uppleggi, tá GOG á heimavølli vann 34-29 á Bjerringbro/Silkeborg. Í steðginum var GOG á odda 14-10. Óli var greitt - sambært hagtølunum - mest effektivi leikarin hjá GOG í dag.

GOG er greitt oddalið í deildini við 25 stigum fyri 13 dystir.

GOG er seks stig frammanfyri Aalborg, ið á heimavølli tapti 27-29 fyri liðnum hjá Jóhan á Plógv Hansen, Skanderborg-Aarhus, ið var á odda 14-8 í steðginum.

Jóhan var toppskjútti hjá Skanderborg-Aarhus við níggju málum upp á 11 málroyndir. Eisini hann var - sambært hagtølunum - mest effektivi leikarin hjá sínum liði í dag.

Skanderborg-Aarhus er nummar fimm í deildini við 16 stigum.

Í Gråkjær Arena í Holstebro var føroyingauppgerð, har liðið hjá Teis Horn Rasmussen, TTH Holstebro vann 32-29 á liðnum hjá Magnusi Árasyni, Mors-Thy. Í steðginum var heimaliðið á odda 18-12.

Magnus skoraði fýra mál upp á fýra málroyndir, og Teis skoraði eitt mál upp á eitt mál.

TTH Holstebro er nummar níggju í deildini við 11 stigum. Mors-Thy er nummar 11 við átta stigum.

Jákup Egholm skoraði tvey mál upp á tvær málroyndir, tá lið hjá honum, TMS Ringsted á útivølli tapti greit 23-34 (11-14) fyri Kolding.

TMS Ringsted er næstaftast í deildini við trimum stigum.