Bakkafrost hevur mist ein av sínum útlendsku íleggjarum.

Hollendska íløgufelagið Triodos Investment Management hevur selt alla sína partabrævaogn í føroyska alifelagnum.

Sambært umhvørvisfelagsskapinum Foodrise, sum er ímóti laksaaling, vórðu seinastu partabrøvini seld í september í ár.

Tað skrivar Kringvarp Føroya við upplýsingum frá VP.fo.

Triodos hevur nú greitt frá, hví felagið tók avgerðina um at selja.

Felagið vísir bæði til fíggjarligu gongdina í Bakkafrosti og trupulleikarnar við vælferðini hjá alifiskinum í Skotlandi.

Sambært Triodos hevur Bakkafrost ikki megnað at lyft skotska virksemið upp á sama støði sum tað føroyska.

Regin Jacobsen vísir atfinningum aftur

Regin Jacobsen, stjóri í Bakkafrosti, viðgongur, at trupulleikarnir í Skotlandi hava verið størri enn væntað.

Men hann er ikki samdur í, at felagið ikki hevur gjørt týðandi framstig.

Í viðmerking til miðilin Fish Farmer vísir hann aftur, at framgongdin í skotska virkseminum hevur verið so lítil, sum atfinningarnar geva eina mynd av.

Bakkafrost hevur síðani yvirtøkuna av skotska alifelagnum arbeitt við at betra framleiðsluna og fáa skotska virksemið upp á sama støði sum í Føroyum.

Tað hevur tó verið ein truplari og meira kostnaðarmikil uppgáva enn upprunaliga væntað.

Sambært Foodrise átti Triodos í november 2024 partabrøv fyri umleið 16 milliónir amerikanskar dollarar í Bakkafrosti.

Tað er ikki upplýst, hvussu nógv hollendska felagið fekk fyri partabrøvini, tá tey vórðu seld í september.

Sølan kemur samstundis sum Bakkafrost arbeiðir við at bøta um framleiðsluúrslitini í Skotlandi og fáa betri lønsemi í virksemið har.

Kelda: Kringvarp Føroya, VP.fo og Fish Farmer.