Mette Frederiksen váttar sunnudagin, at hon í næstu viku skal hitta amerikanska forsetan, Donald Trump.
Fundurin verður í New York í sambandi við ST-aðalfundin, og ætlanin er, at nýggja samstarvsavtalan millum USA, Grønland og Danmark tá skal undirskrivast.
– Eg havi eitt gott samband við amerikanska forsetan, sigur Mette Frederiksen við TV 2 News undan fráferðini til New York.
Hon heldur, at avtalan er góð fyri trygdina í einum alsamt meira ótryggum heimi.
Tað er tó langt síðani, at Mette Frederiksen og Donald Trump eftir øllum at døma seinast tosaðu beinleiðis saman. Seinasta alment kenda samrøðan teirra millum var 15. januar í fjør, eftir at Trump hevði givið til kennar, at hann vildi hava Grønland undir amerikanskt ræði.
Síðani hevur danski uttanríkisráðharrin, Lars Løkke Rasmussen, havt ein stóran leiklut í samskiftinum við USA.
Í januar í ár hitti hann saman við táverandi grønlendska landsstýriskvinnuni í uttanríkismálum, Vivian Motzfeldt, amerikanska varaforsetan J.D. Vance og uttanríkisráðharran Marco Rubio í Washington.
Eftir tann fundin varð ein arbeiðsbólkur settur, og arbeiðið hjá honum hevur nú ført fram til samstarvsavtaluna, sum væntandi verður undirskrivað í næstu viku.
Vil ikki avdúka innihaldið enn
Mette Frederiksen vil framvegis ikki siga ítøkiliga, hvat stendur í avtaluni.
– Vit hava ikki eina avtalu fyrr enn um nakrar dagar, og tað er ikki fyrr enn tá, at eg fari at siga nakað um innihaldið, sigur hon.
Hon sigur tó, at avtalan er góð fyri Grønland og danska ríkið, eins og hon eftir hennara tykki er góð fyri USA, NATO-samgonguna og Evropa.
Spurd, um hon væntar, at Donald Trump og USA fara at halda avtaluna, svarar Mette Frederiksen, at tað roknar hon við.
– Vit eru von við at kunna gera avtalur við hvønn annan í øllum møguligum samanhangum, sigur hon.
