Íslendska uttanríkisráðfrúan, Þorgerður Katrín Gunnarsdóttir, og kanadiski uttanríkisráðharrin, Anita Anand, hittust hósdagin í Reykjavík.
Eftir fundin boðaðu londini frá, at tey vilja styrkja samstarvið um trygd og verju. Serliga leggja tey dent á økta NATO-nærveru á norðurslóðum og í Norðuratlantshavi.
Í felags fráboðanini vísa ráðharrarnir á, at Ísland og Kanada sum arktisk lond hava stór felags áhugamál í at tryggja trygd og støðufesti í økinum.
Tey taka tí undir við, at NATO verður meira sjónligt og virkið í Arktis og í Norðuratlantshavi. Samstundis vilja londini styrkja sítt tvílandasamstarv um trygdar- og verjumál.
Anita Anand skal eisini vitja trygdarøkið á Keflavíkarflogvølli, áðrenn hon fer úr Íslandi.
Norðuratlantshavið fær størri týdning
Fráboðanin kemur í eini tíð, har trygdarpolitikkur fyllir alsamt meira í Norðuratlantshavi.
Í síðstu viku vitjaði amerikanski uttanríkisráðharrin, Marco Rubio, í Íslandi, og hesa vikuna hava stjórnarleiðararnir í Føroyum, Íslandi og Grønlandi eisini hittst í Reykjavík.
Á Arctic Circle-ráðstevnuni, sum nú er í gongd í íslendska høvuðsstaðnum, er trygd í Arktis eitt av høvuðsevnunum. RÚV skrivar, at økt spenningur millum stórveldini og framtíðin hjá Arktis eru millum tey mest umrøddu málini á ráðstevnuni.
Løgmaður, Beinir Johannesen, hevur í sambandi við ráðstevnuna sagt við RÚV, at Føroyar arbeiða saman við donsku myndugleikunum um nýggjan lofteftirlitsradara og ætlanir um radarar til sjóeftirlit. Hann sigur samstundis, at Føroyar ikki arbeiða við eini serligari verjuavtalu við USA, men vilja halda fram við samstarvinum innan NATO.
Sæð við føroyskum eygum er nýggja fráboðanin millum Ísland og Kanada tí ein partur av eini størri menning, har londini kring Føroyar leggja alsamt størri dent á verju, eftirlit og trygd í Norðuratlantshavi.
Eisini handil og orka
Fundurin snúði seg ikki bara um trygd.
Ísland og Kanada vilja eisini dagføra fríhandilsavtaluna sínámillum og stovna eitt felags jarðhitanet, sum skal kanna nýggjar samstarvsmøguleikar millum vinnulív, myndugleikar og arktisk samfeløg.
