Í áratíggju hevur Navi Pillay arbeitt fyri, at fólk, sum fremja álvarslig brotsverk, verða drigin til svars.

Fyri løtu síðani varð kunngjørt, at hon fær friðarheiðursløn Nobels í 2026. Sambært Ritzau fær hon millum annað heiðurslønina fyri at tryggja, at krígsbrotsverk verða rættarsøkt.

Navanethem Pillay, sum vanliga verður nevnd Navi Pillay, varð fødd í Durban í Suðurafrika 23. september 1941. Hon vaks upp undir apartheid, tá rasuskilnaður var grundarlagið undir samfelagnum.

Sum løgfrøðingur vardi hon fólk, ið stríddust móti apartheidstýrinum. Hon arbeiddi eisini fyri rættindunum hjá politiskum fangum á Robben Island, har Nelson Mandela sat fangi.

Í 1995, eftir at apartheid var avtikið, varð hon fyrsta ikki-hvíta kvinnan, sum varð tilnevnd dómari við High Court í Suðurafrika.

Dømdi í málum um fólkadráp

Sama ár varð Pillay vald til dómara við serliga ST-dómstólin fyri Rwanda. Dómstólurin viðgjørdi brotsverk í sambandi við fólkadrápið í 1994.

Hon sat við dómstólin í átta ár og var forseti hansara frá 1999 til 2003.

Pillay var við til at døma í málinum móti Jean-Paul Akayesu. Dómurin fekk stóran týdning fyri altjóða rætt: Neyðtøka varð viðurkend sum brotsverk móti mannaættini og sum ein partur av fólkadrápi, tá endamálið var at oyðileggja ein ávísan fólkabólk.

Stóð á odda fyri mannarættindum hjá ST

Seinni gjørdist hon dómari við Altjóða revsidómstólin í Haag, ICC.

Frá 2008 til 2014 var hon hákommiserur hjá ST fyri mannarættindi. Í tí starvinum var hon ein av fremstu røddunum hjá heimsfelagsskapinum í málum um mannarættindabrot.

Hon hevur eisini ígjøgnum yrkisleiðina arbeitt fyri rættindum hjá kvinnum og var við til at stovna altjóða felagsskapin Equality Now.

Við friðarheiðursløn Nobels fylgja 12 milliónir svenskar krónur, svarandi til umleið átta milliónir danskar krónur, sambært Ritzau.