Ein Tesla, sum koyrir við hjólunum uppeftir, fer á flog og lendir aftur á vegnum.

Tað var sjónin, tá Elon Musk hóskvøldið vísti nýggju útgávuna av Tesla Roadster fram á royndarøkinum hjá SpaceX nærindis Waco í Texas.

Bilurin er mentur í samstarvi millum Tesla og rúmdarfyritøkuna SpaceX.

Sambært Reuters brúkti hann kraftigar viftur, sum súgva luft undan bilinum og halda honum at rampuni við hjólunum uppeftir. Síðani fór hann út í luftina, snaraði og lendi við hjálp frá innbygdum trýstdýsum.

Eingin førari sat við rattið undir framsýningini, upplýsir Ritzau Scanpix.

Myndirnar, sum Tesla hevur latið fjølmiðlunum, vísa hvíta sportbilin í luftini við sjónligum strálum úr dýsunum undir og á síðuni av bilinum.

Tesla ætlar at byrja framleiðsluna í 2028. Verkætlanin hevur tó verið nógv seinkað: Tá ein undangonguútgáva varð víst fram í 2017, var ætlanin at lata fyrstu bilarnar í 2020.

Felagið kunngjørdi ongan endaligan søluprís á tiltakinum.

Talan er heldur ikki um, at allar útgávur fáa somu flogeginleikar. Sambært Reuters lýsir Tesla eina serliga útgávu, nevnda Rocket, sum hevur eina fulla flogskipan og bert verður boðin útvaldum keyparum.