Mótmælini byrjaðu klokkan 15 og vóru knýtt saman við beinleiðis sending og felags skrá. Tað skrivar íslendska kringvaprið, RÚV.

Tað er ætlanin hjá Kaldvík um at ala upp í 10.000 tons av laksi í Seyðisfirði, sum hevur elvt til mótstøðuna. Felagið fekk í september loyvi til alingina.

Sambært RÚV hava nú nærum 14.000 fólk skrivað undir eina áheitan um at verja Seyðisfjørð. Mótmælini eru skipað í samstarvi millum Landvernd, NASF, felagið Vá! í Seyðisfirði og fleiri onnur náttúruverndarfeløg.

Fyriskipararnir siga, at Seyðisfjørður er vorðin ein ímynd av einum størri stríði um fólkaræði, náttúruvernd og almenn áhugamál í Íslandi. Teir spyrja eisini, hvønn týdning almenn hoyring hevur, um stór lokal mótstøða ikki verður tikin til eftirtektar.

Mótstøðan móti alingini hevur vart leingi. Longu 5. oktober boðaði Landssamband veiðifélaga frá, at felagið ætlaði at kæra loyvið hjá Kaldvík. Felagið heldur, at aling av kynsbúnum laksi í firðinum kann vera ein ov stórur váði fyri villar laksa- og sílastovnar.