Russland og Ukraina hava sambært amerikanska forsetanum, Donald Trump, gjørt eina avtalu um tað, hann kallar eina vápnahvíld á orkuøkinum.

Í einum uppslagi á Truth Social sunnudagin skrivar Trump, at avtalan er komin í gildi alt fyri eitt.

– Við virknaði beinanvegin er vápnahvíld á orkuøkinum í krígnum millum Russland og Ukraina. Báðir partar eru samdir. Brótið hana ikki, skrivar Trump.

Hann greiðir ikki nærri frá, hvat avtalan fevnir um.

Ukrainski forsetin, Volodymyr Zelenskyj, sigur við miðilin Axios, at boðini frá Trump eru nýggj fyri honum.

– Men um russararnir taka undir við eini vápnahvíld á orkuøkinum, so tekur Ukraina eisini undir við henni, sigur Zelenskyj.

Russisku myndugleikarnir hava enn ikki politiskt váttað boðini frá Trump.

Almenna russiska kjarnorkufelagið Rosatom sigur tó, at tað væntar eina vápnahvíld kring kjarnorkuverkið Zaporizjzja í næstum, so fleiri umvælingar kunnu gerast. Tað skrivar Reuters.

Boðini frá Trump koma eftir fleiri dagar við ósemjum millum amerikanska og ukrainska forsetan.

Fríggjadagin legði Trump fram eina avtalu um, at Russland skal veita diesel til USA. Leygardagin segði hann við tíðindafólk, at Zelenskyj hevði gingið ímóti boðum hansara um ikki at leypa á russisk oljureinsiverk.

Sambært Trump kunnu álopini gera alheims brennievnistrotið verri.

Zelenskyj kallaði dieselavtaluna við Russland eina veika avgerð. Trump segði síðani, at Ukraina hevur tørv á einum nýggjum forseta.

/Ritzau/