Í týsku bundesliguni vóru tvey føroyingalið í leiki í dag.

Liðið hjá Eliasi Ellefsen á Skipagøtu, THW Kiel vann á heimavølli greiðan 26-19 sigur á Hamburg. Í fyrra hálvleiki haltaði hjá Kiel, og var støðan javnleikur 11-11 í steðginum.

Elias var bert á vøllinum í fýra minuttir og 22 sekund, og hann var bert noteraður fyri eitt upplegg til mál. Tað tykist sum um fráferðin til Aalborg komandi summar hevur avleiðingar fyri Elias.

THW Kiel er næstfremst í deildini við 15 stigum.

Betri er við spælitíð til Hákun West av Teigum í Füchse Berlin. Hákun var á vøllinum í 38 og ein hálvan minutt, og hann skoraði tvey mál upp á tvær málroyndir, tá Füchse Berlin á heimavølli tapti 36-37 fyri Lemgo. Í steðginum vóru berlinarnir á odda 19-17.

Füchse Berlin er nummar fýra við 10 stigum.

Fríggjakvøldið taptu Vilhelm Poulsen og liðfelagarnir í Hannover-Burgdorf á heimavølli 32-39 (16-20) fyri oddaliðnum, Flensburg-Hannover.

Hannover-Burgdorf er nummar níggju við níggju stigum.