Tað er eitt av størri revsimálunum í Føroya Rætti í seinastuni, sum byrjaði í morgun.
Tveir menn, 53 og 37 ára gamlir, sita á ákærubeinkinum. Teir eru sambært Kringvarpinum ákærdir fyri serliga grovan og ráan harðskap, rán og fyri at royna at seta eld á. Annar teirra er eisini ákærdur fyri hóttan.
Málið stavar frá eini álvarsamari hending í einum sethúsum í Tvørgøtu í Havn 18. februar í ár. Sum in.fo skrivaði í síðstu viku, fekk løgreglan beint fyri klokkan 18 henda dagin fráboðan frá einum manni, sum segði seg vera álopnan í sínum egna heimi. Tá løgreglan kom á staðið, var eldur í húsinum, og maðurin var framvegis inni og illa viðfarin.
Sligin og sparkaður í høvdið
Nú ákæruritið er lisið upp í rættinum, eru fleiri upplýsingar komnar fram um, hvat ákæruvaldið heldur fór fram í húsunum.
Sambært Kringvarpinum eru menninir ákærdir fyri at hava sligið og sparkað húsánaran nógvar ferðir. Hann skal millum annað hava verið sligin og sparkaður í høvdið og andlitið.
Teir eru eisini ákærdir fyri at hava rænt øl og cider, heilivág, pengar og gjaldskort frá manninum.
Annar ákærdi skal harumframt hava hótt mannin við at drepa hann, um hann segði løgregluni frá.
Settu eld á song og troyggju
Ákæran fevnir eisini um roynd at seta eld á húsini.
Sambært ákæruritinum festu menninir í eina song og eina troyggju. Eldurin varð tó sløktur, áðrenn hann breiddi seg meira.
Í ákæruritinum stendur eisini, at roykurin frá eldinum var eitraður.
Ein maður varð handtikin stutt eftir hendingina 18. februar, og dagin eftir varð hin maðurin handtikin. Teir hava sitið varðhaldsfongslaðir síðani.
Báðir menninir nokta seg sekar.
Nevningating alla vikuna
Talan er um nevningating. Tá ákæruvaldið krevur, at eitt revsimál verður viðgjørt sum nevningating, er kravið um revsing sambært Kringvarpinum í minsta lagi fýra ára fongsul.
Føroya Rættur hevur sett alla vikuna av til málið. Rættarfundir eru frá klokkan 9.15 til 15 frá í dag og til og við fríggjadagin 2. oktober.
Sambært rættarskránni eru tilsamans 28 tímar og 45 minuttir settir av til viðgerðina.
