Hóskvøldið hin 24. september var fyrsti upplýsingarfundurin fyri tilflytarar í Integratión Norð/ Eystur, har Sóley Sjúrðaberg integratiónssamskipari, kunnaði um lívið í Føroyum og møguleikarnar fyri at gerast virknir limir í samfelagnum.

- Umleið 12 tilflytarar møttu til hendan fyrsta kunningarfundin, sum varð hildin í Miðnámi á Kambsdali. Endamálið við fundinum var at geva nyttugar upplýsingar um føroyska samfelagið, mentan, gerandislív, rættindi og ábyrgdir.

Soleðis verður sagt á heimasíðuni hjá Eysturkommunu í dag, og her verður lagt aftrat, at fundurin eisini gav møguleikar at læra um almennu tænasturnar, at hitta onnur nýkomin og at gerast partur av lokala samfelagnum.

Sóley Sjúrðaberg, integratiónssamskipari, fegnast um, at fundurin eydnaðist sera væl - at fleiri tilflytarar møttu og luttóku aktivt, har tey lutaðu sínámillum spurningar, royndir og sjónarmið.

– Samrøðurnar staðfestu ein sterkan áhuga í at læra meir um lívið í Føroyum og at gerast virknir limir í samfelagnum.

Integratión NorðEystur hevur fyri fáum døgum síðan fingið nýggja heimasíðu - www.ine.fo - har øll kunning, sum er viðkomandi fyri tilflytarar og onnur áhugað, verður savnað.

Sagt verður, at Integratión Norð/ Eystur fevnir um Fuglafjarðar kommunu, Eysturkommunu, Klaksvíkar kommunu, Kunoyar kommunu, Hvannasunds kommunu, Viðareiðis kommunu og Fugloyar kommunu.

- Næsti kunningarfundur verður í Miðnámi á Kambsdali hóskvøldið hin 29. oktober frá klokkan 18:20-19:20, verður sagt á heimasíðuni hjá Eysturkommunu.