Team Sydhavsøerne, hvørs besta lið spælir í næstbestu donsku hondbóltsdeildini boðar nú alment frá, at tey og føroyski landsliðsleikarin, Pætur Mikkjalsson eru blivin samd um at steðga samstarvinum.
Talan hevur verið um væl minni spælitíð til Pætur seinastu tíðina, og á heimafrontinum er eitt barn á veg, so tað eru bæði ítróttarligar og menniskjaligar orsøkir til, at Pætur nú fer at leita sær eftir øðrum felagi.
Ítróttarstjórin í Team Sydhavsøerne, Morten Juul sigur við heimasíðu felagins: - Pætur hevur verið ein ógvuliga professionellur og virðismettur partur av Team Sydhavsøerne. Sæð í ljósinum av, at hann hevur fingið ein minni leiklut, og teimum familju broytingum, ið standa fyri framman, so hava vit aftaná Pætur vendi sær til okkum mett, at hetta er rætta løtan hjá pørtunum at fara hvør sínar leiðir. Vit í felagnum ynskja honum og familju hansara alt tað besta í komandi tíðum.
Við somu heimasíðu sigur Pætur: - Eg er takksamur fyri mína tíð í Team Sydhavsøerne, og fyri tann stuðul eg havi fingið frá bæði felagnum, liðfeløgunum og fjepparunum. Eg síggi fram til ein nýggjan kapitul, bæði á og uttanfyri hondbóltsvøllin, har tað at blíva pápi sjálvandi fer at fylla nógv.
Enn frættist ikki hvar leiðin gongur hjá Pæturi í hondbóltshøpi.
