Jenis av Rana handaði í kvøld Olafi Johannesen fremstu mentanarvirðisløn í Føroyum. Olaf Johannessen fekk í kvøld Mentanarvirðisløn landsins 2021.

Jenis av Rana, landsstýrismaður, segði m.a. í grundgeingunum, at Olaf hevur í Danmark fingið mangar viðurkenningar, eittnú kendu Reumert heiðurslønina.

Olaf Johannessen takkaði sera fegin fyri heiðurin og virðislønina, og ávaraði um, at tár kundu koma fyri. Hann hugleiddi um lív sítt sum sonur sjónleikara, ið virkaði í einum landi, ið ikki átti eitt leikhús, og hugleiddi Olaf um pápa sín, Eyðun Johannessen, ið sum fyrsti sjónleikari í Føroyum við útbúgving á økinum, bardist fyri leiklistini. Eisini takkaði hann familju og nærsambondum.

Síðani var á sjónbandi víst nakað av tí, sum Olaf hevur avrikað á palli í Danmark og í Føroyum.

Gunnvá Zachariassen, sjónleikari, bar síðani fram kvøðu.

Eftir at Uni Debess og manning høvdu framført tónleik, fekk Jenis av Rana, landsstýrismaður, orðið og bar fram endarøðu.

• Mentanarvirðisløn landsins er 150.000 kr. Hon verður latin fyri at heiðra føroyskt mentafólk sum tøkk fyri útint listarligt avrik.