Í einari fullsettari høll í Svendborg Arena eydnaðist tað í kvøld Óla Mittún og liðfeløgunum at vinna ein flottan sigur í bólki D í Champions League.
Tað eydnaðist GOG at vinna 36-34 á ungarska stórliðnum, Szeged. Í steðginum var GOG á odda 18-17.
Óli var flúgvandi í kvøld. Hann skoraði 10 mál upp á 11 málroyndir, og hann var saman við Manuel Zehnder toppskjútti hjá GOG í kvøld. Óli legði eisini upp til fimm mál, og hann hevði eitt sonevnt: "Steal", har hann vann bóltin í einari álopsstøðu hjá Szeged.
Í sama bólki vann Sporting Lissabon á útivølli greiðan 37-29 (22-16) sigur á svenska liðnum, Kristianstad.
Aftaná tvey umfør er Sporting fremst við fýra stigum. GOG og Szeged hava tvey stig hvør, meðan Kristianstad hevur fyrsta stigið til góðar.
Klokkan 19.45 byrjar dysturin í Max Schmelling høllini í Berlin í bólki A, har Hákun West av Teigum og liðfelagarnir í Füchse Berlin taka ímóti einum øðrum ungarskum stórliði, Veszprem.
