Valluttøkan á tjóðartingsvalinum í Ísrael í dag er óvanliga stór.

Klokkan 16 ísraelska tíð høvdu 55,7 prosent av veljarunum greitt atkvøðu. Til samanberingar var valluttøkan 47,5 prosent um somu tíð á valinum í 2022.

Sambært ísraelsku valnevndini er hetta hægsta valluttøkan, sum er skrásett um hetta mundið á valdegnum. Tað skrivar Times of Israel.

Valið er tað fyrsta til ísraelska tjóðartingið, Knesset, síðan álopið hjá Hamas 7. oktober 2023 og kríggini, sum fylgdu.

Netanyahu biður veljararnar fara á val

Benjamin Netanyahu, forsætisráðharri, hevur í dag heitt á sínar stuðlar um at fara á val.

Hann hevur samstundis sett fram pástandir um, at roynt verður at stjala valið frá honum. Valnevndin sigur tó, at hon ikki hevur prógv um skipað valsvik.

Ein av høvuðskappingarneytunum hjá Netanyahu er fyrrverandi herleiðarin Gadi Eisenkot. Flokkur hansara, Yashar, leggur Netanyahu undir at sáa iva um álitið á valúrslitið.

Kanningarnar undan valinum bentu á eitt tætt val, har hvørki stjórnarflokkarnir hjá Netanyahu ella mótstøðuflokkarnir høvdu tryggan meiriluta.

Stóra valluttøkan sigur tó ikki í sjálvum sær, hvørjum tað hevur gingist best hjá.

Fyrstu ábendingar í kvøld

Valstøðini lata eftir ætlan aftur klokkan 22 í Ísrael, sum er klokkan 20 føroyska tíð. Tá fara ísraelsku sjónvarpsrásirnar eftir ætlan at almannakunngera fyrstu valstaðarkanningarnar.

Valnevndin hevur tó boðað frá, at fólk, sum standa í bíðirøð við afturlating, sleppa at atkvøða. Tað kann seinka valstaðarkanningunum.

Síðan byrjar uppteljingin. Hóast fyrstu ábendingarnar um úrslitið væntast í kvøld, kann tað taka longri tíð at fáa greiði á, hvør kann savna ein stjórnarmeiriluta í Knesset.

Keldur: Times of Israel, AP og Reuters