Russland, USA og Kina kunnu styrkja støðufestið í heiminum, um londini samstarva. Tað segði russiski forsetin, Vladimir Putin, á fundinum við amerikanska forsetan, Donald Trump, og kinesiska forsetan, Xi Jinping, skrivar Reuters.
Putin segði, at londini millum annað áttu at umrøða samstarv í ymiskum heimspørtum og trygdina í orkuveitingini.
Trump segði í byrjanini av fundinum, at leiðararnir fóru at umrøða kríggið í Ukraina.
– Vit fara at tosa um kríggið millum Russland og Ukraina. Latið okkum síggja, um vit kunnu fáa nakað at henda, segði Trump.
Framman undan felags fundinum hevði Trump havt fundir við Putin og Xi hvør sær.
Xi Jinping segði, at tað var slóðbrótandi, at leiðararnir í teimum trimum londunum hittust á einum felags fundi fyri fyrstu ferð. Hann vísti á, at øll trý londini hava fast sæti í trygdarráðnum hjá ST, og segði, at tey eiga at samstarva um altjóða avbjóðingar og verja friðin í heiminum.
Parturin av fundinum, sum fjølmiðlarnir høvdu atgongd til, vardi umleið tíggju minuttir.
Sameindu hjá Ukraina hittast í Berlin
Sama dag hittast sameindu hjá Ukraina í týska høvuðsstaðnum Berlin. Har eru amerikansku sendimenninir Jared Kushner og Steve Witkoff eisini við. Teir skulu umrøða kríggið við ukrainska forsetan, Volodymyr Zelenskyj, og evropeisku samstarvsfelagarnar.
Kelduupplýsingar frá Ritzau og Reuters.