Hví brúka russisk fiskiskip fleiri dagar í føroyskum sjógvi, hóast veiðan er minkað?
Tað er ein av spurningunum, sum Sámal Petur í Grund, løgtingsmaður, setur Bárði á Steig Nielsen, landsstýrismanni í uttanríkis- og fiskivinnumálum, í einum skrivligum fyrispurningi eftir grein 53 í tingskipanini.
Hann vil vita, hvørjar trygdarmetingar verða gjørdar, áðrenn russisk fiskiskip fáa loyvi at fiska í føroyskum sjógvi, og hvussu myndugleikarnir hava eftirlit við, at skipini ikki reka annað virksemi, sum kann hótta trygdina í Føroyum.
Minni veiða og fleiri fiskidagar
Í viðmerkingunum vísir Sámal Petur í Grund til eina grein hjá Sjúrði Skaale í Norðlýsinum 25. oktober.
Sambært tølunum, sum verða endurgivin í fyrispurninginum, fiskaðu russisk skip 92.413 tons fyrra hálvár 2025 og 78.558 tons fyrra hálvár 2026. Samstundis vaks talið av fiskidøgum úr 670 upp í 722.
Lesið eisini: Illgrunasom russisk skip fiska minni – men eru meir til staðar
Løgtingsmaðurin vísir eisini til upplýsingar í greinini um, at skip, sum hava verið undir illgruna fyri annað virksemi enn fiskiskap, hava fingið fiskiloyvi.
Hann leggur tó dent á, at upplýsingarnar ikki í sjálvum sær eru prógv um ólógligt virksemi.
Tær reisa kortini spurningar um grundarlagið undir loyvunum og eftirlitið við skipunum, heldur hann.
Vil hava trygdina við í samráðingarnar
Sámal Petur í Grund spyr, um landsstýrið hevur kannað, hví russisku skipini eru fleiri dagar í føroyskum sjógvi, hóast tey fiska minni.
Harumframt vil hann vita, um landsstýrismaðurin ætlar at endurskoða treytirnar fyri russiskum fiskiloyvum og leggja størri dent á trygdaráhugamál í komandi fiskivinnusamráðingum við Russland.
Í viðmerkingunum vísir hann á umrøðu av illgrunasamari ferðslu hjá russiskum skipum nær við týðandi samskiftiskaðlar í Norðuratlantshavi.
Føroyar eru í stóran mun bundnar at sjókaðlum og øðrum týðandi undirstøðukervi, sum krevur verju, skrivar hann.
Løgtingsmaðurin staðfestir samstundis, at fiskivinnusamstarvið við Russland hevur havt búskaparligan týdning fyri føroyska fiskivinnu. Hann vil tí hava bæði búskaparliga gagnið og møguliga trygdarvandan lýstan.
Fyrispurningurin er dagfestur 4. november.
