Stuðulin úr Hjálpargrunninum fyri óarbeiðsførar fiskimenn verður veittur á hvørjum ári til jóla, og ætlar tú tær at søkja hesaferð, skal umsóknin verða grunninum í hendi í seinasta lagi hin 11. desember 2026.

Hetta er ein gamal grunnur, settur á stovn í 1938. Endamálið er at veita sjófólki, sum eru vorðin óarbeiðsfør av sjúku ella skaða á sjónum, stuðul.

- Virksemið hjá grunninum hevur øll hesi ár havt alstóran týdning fyri tey sjófólk og familjur teirra, sum á ein ella annan hátt hava havt henda stuðul fyri neyðini.

Grunnurin hevur eisini sum endamál at veita stuðul til heilsuhjálpandi og fyribyrgandi átøk, sum felagsskapir skipa fyri.

- Harumframt veitir Hjálpargrunnurin fyri óarbeiðsførar fiskimenn fíggjarligan stuðul til eftirsitandi hjá sjófólki, umframt til arbeiðið ímóti tuberklum ella til annað sjúkufyribyrgjandi- ella sjúkulekjandi arbeiði í Føroyum.

Í stuttum kann sigast, at grunnurin veitir fíggjarligan stuðul til sjófólk, sum eru vorðin óarbeiðsfør av sjúku, og sum ikki kunnu fáa nøktandi fíggjarligan stuðul aðrastaðni.

- Umsóknir, har váttan frá Taks ella lækna vanta, verða ikki tiknar við, eins og persónar, sum eru eldri enn 67 ár, fáa ikki stuðul úr Hjálpargrunninum fyri óarbeiðsførar fiskimenn.

Hevur tú tørv á at søkja um fíggjarligan stuðul, kanst tú eitt nú fara inn á heimasíðuna hjá Føroya Skipara-og Navigatørfelag - www.fsn.fo - og her liggur leinkja, sum vísir tær, hvussu tú kanst søkja.