Skipanes hjá Smyril Line er nú á veg til Hongkong, har skaðin eftir eldin í maskinrúminum fyrr í hesum mánaðinum skal umvælast.

Tað upplýsir Jens Meinhard Rasmussen, stjóri í Smyril Line, fyri Kringvarpinum.

– Skaðin er avmarkaður, og roknað verður við, at umvælingararbeiðið fer at taka seks til átta vikur, sigur hann í sms-boðum við Kringvarpið.

Skipanes kemur eftir ætlan til Hongkong í morginári.

900 elbilar eru umborð

Skipið siglir ikki tómt til Hongkong. Tað er lastað, og sambært stjóranum í Smyril Line eru millum annað umleið 900 elbilar umborð.

Skipanes er annað av teimum báðum nýggju farmaskipunum hjá Smyril Line, sum eru bygd í Kina og skulu styrkja farmaflutningin hjá felagnum.

Men heimferðin hjá Skipanesi fekk ein óvæntaðan steðg, tá eldur kom í maskinrúmið 2. september.

Eldurin varð skjótt sløktur, og eingin fólkaskaði var. 23 mans eru í manningini.

Fór aftur á skipasmiðju

Tá eldurin kom í, var Skipanes umleið 20 fjórðingar úr Taivan. Skipið fór síðani aftur á skipasmiðju í Kina, har skaðin varð kannaður.

Nú er niðurstøðan, at skipið skal til Hongkong at umvælast.

Sambært Kringvarpinum fór Skipanes úr Xiamen í Kina mikunáttina. Upplýsingar frá Vesselfinder og MarineTraffic vísa, at kósin er sett móti Hongkong.

Um metingin hjá Smyril Line heldur, verða tað sostatt seks til átta vikur afturat, áðrenn umvælingin er liðug.