Vaktleiðarin á løgreglustøðini í Havn visti í morgun at siga, at tað á ávísum vegastrekkjum hevur verið rættiliga hált í nátt og í morgun.

Stutt eftir midnátt í gjárkvøldið hendi eitt ferðsluóhapp í hálkuni á Kaldbaksvegnum, har tey tilsamans seks fólkini, sum vóru í bilunum, tíbetur sluppu merkiliga væl frá hendingini.

- Óhappið hendi á vegnum niðan móti Kaldbakstunlinum, har annar bilurin var á veg suðureftir og hin á veg norðureftir.

Vaktleiðarin sigur, at annar bilurin helst er farin skeivur á vegnum í nógvu hálkuni, og hetta gjørdist til ein frontalan samanstoyt. 

- Í øðrum bilinum vóru fimm fólk, og í hinum var førarin einsamallur. Báðir bilarnir fingu stóran skaða, men tíbetur sluppu øll seks fólkini væl frá hendingini.

Sjúkrabilar komu á staðið. Nøkur fólk vórðu kannað á staðnum, og onnur vórðu tikin við á Landssjúkrahúsið til kanningar.

- Men, tíbetur vísti tað seg, at her var ikki talan um álvarslig likamlig mein, og øll sluppu eftir umstøðunum væl frá hendingini.

Sambært vaktleiðaranum var so hált á hesum vegastrekki á Kaldbaksvegnum hesa løtu, at tey noyddust at senda boð eftir Landsverki at salta vegin beinanvegin.

- Um vegurin ikki varð saltaður, hevði verið neyðugt at stongt vegin, men tíbetur komu fólk hjá Landsverki beinanvegin.

Løgreglan fer at avhoyra fólkini, sum vóru í bilinum fyri at finna út av júst, hvat tað var sum hendi á Kaldbaksvegnum í nógvu hálkuni í nátt.

- Vit kundu eisini staðfesta, at hvørgin bilførarin var ávirkaður av rúsdrekka, leggur vaktleiðarin aftrat.