Donald Trump, forseti í USA, hevur avlýst tveir veljarafundir, sum skuldu vera í statunum Kansas og Iowa um vikuskiftið.

Tað boðaði landsnevndin hjá Republikanska flokkinum, RNC, frá náttina til fríggjadag, skrivar tíðindastovan AP sambært Ritzau.

Í staðin fer Trump næstu 72 tímarnar at halda sokallaðar »telerallies«, har hann tosar við veljarar um telefon og á netinum.

Sambært RNC skal broytingin gera forsetanum møguligt at røkka fleiri veljarum kring alt landið undan miðskeiðsvalinum týsdagin 3. november. Slíkir fundir eru fyribils ætlaðir í 20 statum, og fleiri kunnu koma afturat.

Fundurin í Daytona Beach í Florida náttina til leygardag okkara tíð verður sostatt seinasti veljarafundurin í hesum valstríðnum, har Trump sjálvur stendur á pallinum framman fyri áhoyrarum.

Trump fór undir eitt 32 dagar langt valstríð fyrst í oktober fyri at styrkja møguleikarnar hjá republikansku valevnunum. Málið var at halda fleiri enn 30 veljarafundir, men higartil eru teir vorðnir 25, skrivar AP.

Sambært tíðindastovuni hava hesa vikuna verið tekin um, at nógvu ferðirnar og longu røðurnar eru farnar at merkja forsetan.

– Gud hevur ikki skapt ræddarbond tykkara til at halda veljarafundir hvønn dag, segði Trump við hásari rødd á einum fundi í Mississippi mánadagin.

Tá ein tíðindamaður í nátt spurdi, um heilsan var orsøkin til avlýstu ferðina til Kansas, svaraði Trump hvassliga aftur.

– Tú hevur fylgt mær í tvær vikur. Eg havi tað frálíkt, segði hann og bað síðani tíðindamannin sjálvan koma í betri venjing.

Fleiri veljarakanningar benda á, at republikanararnir kunnu fáa trupult við at varðveita meirilutan í báðum kømrunum í Kongressini, Senatinum og Umboðsmannatinginum. Flokkurin hevur ein tepran meiriluta í báðum.

Kansas verður vanliga roknað sum ein av borgunum hjá republikanarunum, og í Iowa fekk Trump greiðan meiriluta á forsetavalinum í 2024.

Kortini verður sambært AP roknað við tøttum valstríði í báðum statunum og í Alaska, Ohio, Texas og South Carolina.

/ritzau/