Norski forsætisráðharrin, Jonas Gahr Støre, vísir aftur tíðindum um, at Donald Trump var illur við evropeiskar leiðarar í eini telefonsamrøðu hósdagin.
Hósdagin hittust Vladimir Putin og Donald Trump í Kina.
Fleiri altjóða miðlar hava síðan borið tíðindi um, at amerikanski forsetin eftir fundin ringdi til tey evropeisku londini í samgonguni av londum, sum stuðla Ukraina, har eitt nú Noreg eisini er við.
Sambært bretska blaðnum The Telegraph var Trump ikki blíður, og miðilin Politico skrivaði, at Trump skal hava sagt, at milliardirnar, sum verða latnar til Ukraina, eru burturspiltar.
Men hesum vísir norski forsætisráðharrin aftur í samrøðu við norska TV 2 í dag.
– Nei, als ikki. Tann, sum skrivaði hetta, var jú ikki til staðar á fundinum. Talan var meira um ein sera eldhugaðan Trump, soleiðis sum vit av og á hoyra hann, har hann tosar nógv um seg sjálvan og tað, sum hann er upptikin av at fáa framt.
Tað sigur Jonas Gahr Støre við TV2.no.
Hann vísir eisini aftur pástandinum hjá Politico um, at Trump kallaði stuðulin til Ukraina fyri burturspiltan.
– Tað var ikki soleiðis, eg hoyrdi hann. Hann sigur jú, at hetta er ræðuligt, og at nógv fólk verða dripin. Nú má ein endi fáast á krígnum, so peningurin kann brúkast til okkurt annað.
Støre heldur, at hetta er eitt gott poeng, sum hann tekur til.
- Eg haldi, at vit skulu brúka pengar til at stuðla einari endurreisn av Ukraina og stuðla Ukraina, soleiðis at landið eisini hevur eina verju eftir kríggið, sigur norski forsætisráðharrin, Jonas Gahr Støre, við TV2.no