Stovnsmenning og burðardygg umsiting av fiskastovnum er millum høvuðsevnini á almennu ráðstevnuni, Fiskur og framtíðin – møguleikar og avbjóðingar, sum verður í Kongshøll hin 8. juni.
- Burðardygg stovnsrøkt snýr seg um at umsita fiskatilfeingið soleiðis, at tað kann gagna samfelagnum sum mest. Vitan um vistskipanir, havstreymar og veðurlagsbroytingar geva nýggjar møguleikar at skilja og umsita fiskastovnarnar.
Havstovan, sum hevur sent út kunning um ráðstevnuna, sigur, at bæði føroyskir og útlendskir granskarar fara at viðgera hetta evnið í Kongshøll.
Eystrasalt og Ísland
Fyrst greiðir Henrik Svedäng, lektari á svenska havumhvørvisstovninum, SINE, við universitetið í Gøteborg, frá minkingini í toskastovninum í Eystrasalti seinastu áratíggjuni. Meðan minkingin í vestara parti av økinum kemst av ovurfisking, er eystari partur meira samansettur, m.a. færri gýtingarøki og broytt vakstrarmynstur hjá ungfiski.
Guðmundur Þórðarson, Ph.D. og leiðari fyri íslendsku strandarlandasamráðingarnar fyri uppsjóvarfisk, fer at tosa um umsitingarætlanina fyri tosk. Íslendski toskafiskiskapurin minkaði nógv frá 50-unum, og niðurgongdin steðgaði ikki fyrr enn í 90-unum, tá ið avmarkingar vórðu settar á veiðuna. Greitt verður eisini frá samanspælinum millum politikk, ídnað og vísind í Íslandi.
Føroyskir granskarar
Tveir føroyskir granskarar eru á røðaralistanum um hetta evnið. Hjálmar Hátún, Ph.D. og havfrøðingur á Havstovuni, greiðir frá, hvussu havstreymar og veðurlagsbroytingar ávirka føðina í sjónum, og harvið eisini fiska- og fuglastovnar. Sostatt er tað ikki bara veiðitrýst, sum ávirkar gongd í fiskastovnum, og tí er neyðugt at taka atlit til hesi viðurskifti, tá vit umsita fiskastovnarnar.
Helga Bára Mohr Vang, lívfrøðingur og granskari á Havstovuni, leggur fram um føroysku botnfiskastovnarnar. Framløgan nertir við, hvørjar møguleikar og avbjóðingar vit hava í umsitingini av botnfiski í framtíðini, har burðardyggur fiskiskapur í einum broytiligum umhvørvi er ein høvuðstáttur. Fyri at umsita stovnarnar væl, mugu vit sostatt bæði hyggja at fiskiskapi og støðuni í vistskipanini og fylgja við umhvørvisbroytingum.
Skrá og tilmelding
Ráðstevnan í Kongshøll byrjar klokkan 8 og endar klokkan 15.45. Tiltakið er alment og ókeypis. Tó er neyðugt at melda til, og meldast kann til um heimasíðuna - www.hav.fo
- Tað er føroyski formansskapurin í fiskivinnusamstarvinum í Norðurlendska Ráðharraráðnum, sum skipar fyri ráðstevnuni, og endamálið er at viðgera, hvussu framtíðar samfeløg kunnu fáa mest virði burtur úr havsins tilfeingi, siga tey á Havstovuni í tíðindaskrivi.
