Fert tú á ólavsøku í ár? 
- Ja, vit eru altíð á ólavsøku, um vit eru heima, sigur Janus Knudsen.
Hvussu heldur tú ólavsøku?    
- Tað er sum hjá føroyingum flestum, og silvurið má pussast, so eg kann fara í føroysku klæðini. 
Janus sigur, at familjan fer til kappróður, tivoli við børnunum, skrúðgongu og kórsang.
- Vit fara eisini til midnáttarsangin og ymiskt annað, sum er á skránni á ólavsøku.
Hvat er tað besta við ólavsøkuni?   
- Tað er samanhaldið millum føroyingar. At hitta vinir og kenningar, hugnin annars og ein góður biti frá systkinabarninum. 
Er onkur serlig ólavsøka, tú minnist?    
- Ja, ólavsøkan í 1998, tá eg møtti konu míni – og so gulu ólavsøkuna í 2002, tá Tjaldrið vann, Eysturoyingur gjørdist føroyameistari, og NSÍ vann steypakappingina. 
Kundi okkurt verið øðrvísi við ólavsøkuni? 
- Nei, hon skal verða akkurát, sum hon plagar, heldur Janus Knudsen fyri.