Amerikanski forsetin, Donald Trump, handaði hósdag Elon Musk vísindaheiðursmedaljuna National Medal of Science á eini ráðstevnu í Washington D.C.
Medaljan er ein av mest tignarligu vísindaligu heiðurslønum í USA, skrivar tíðindastovan AFP sambært Ritzau.
Við handanina rósti Trump Musk, sum stendur á odda fyri rúmdarfyritøkuni SpaceX og elbilaframleiðaranum Tesla. Forsetin kallaði hann ein »tjóðardýrgrip« og »Thomas Edison í okkara tíð«.
– Elon, eg vil ynskja tær til lukku. Tú ert vinur mín og alt hatta, men tú ert ein heilt, heilt serligur maður, segði Trump.
Seks leiðarar heiðraðir
Musk var ein av seks leiðarum úr tøknugeiranum, sum vórðu heiðraðir á ráðstevnuni.
Sergey Brin, sum var við til at stovna Google, Jensen Huang, stjóri í Nvidia, og Lisa Su, stjóri í AMD, fingu eisini National Medal of Science.
Michael Dell, stjóri í Dell Technologies, og Satya Nadella, stjóri í Microsoft, fingu National Medal of Technology and Innovation, sum er ein heiðursmedalja fyri tøkni og nýskapan.
Sambært Hvítu Húsunum fekk Musk heiðurin fyri verkfrøðilig avrik, sum hava flutt mørkini innan millum annað rúmdarferð, samskifti og intelligentar skipanir.
