Ein Aron Benjaminsen í stórformi tryggjaði føroysku U21-landsliðnum ein 2-1 undankappingarsigur á Estlandi í Pärnu.
Í 55. minutti fangaði Aron eina sløsuta sending hjá estiska málverjanum, og úr 20 metrum meddaði hann bóltin í netið til 1-0.
11 minuttir seinni gjørdi Aron eitt "raid", ið minti um málið Maradona skoraði móti Onglandi í HM-endaspælinum í Meksiko í 1986. Hann setti fleiri estiskar verjuleikarar av, og komin inn í brotsteigin hamraði hann bóltin í netið til støðuna 2-0.
Í 81. minutti fekk Estland minkað um munin við einum brotssparki, men nærri komu teir ikki einum stigi.
Estland hevði bóltin 75 prosent av tíðini, og teir høvdu fleiri málroyndir enn føroyska U21-landsliðið. Men okkara vardu væl, og so høvdu vit Aron Benjaminsen.
Góði sigurin merkir, at føroyska U21-landsliðið hevur sett nýtt stigamet fyri U21-landslið. Gamla metið átti U21-landsliðið, ið Heðin Askham og Bill McLeod Jacobsen høvdu undir sær á sinni. Í 2011 megnaði tað liðið 11 stig í einari undankapping.
Hetta U21-landsliðið hevur megnað 12 stig í átta dystum, og tá hevur liðið enntá tveir dystir eftir at leika. Talan er um heimadystir í báðum førum
Mikudagin klokkan 17 kann føroyska U21-landsliðið byggja upp á stigametið. Tá taka okkara móti Luksemborg á vøllinum við Djúpumýru í Klaksvík.
Í seinastu HM-undankappingini megnaði A-landslið 12 stig, ið er stigamet fyri eina undankapping hjá einum føroyskum A-landsliði.
