Í viku 37 høvdu Dagstovnurin Varðin og Barnahúsið Sellin í Runavíkar kommunu vitjan av samstarvsfeløgum úr Estlandi, Lettlandi og Litava.

- Dagstovnurin Varðin og Barnahúsið Sellin á Skála eru partur av einum altjóða samstarvi gjøgnum Nordplus Junior Mobility, har starvsfólk úr ymiskum londum fáa høvi at vitja dagstovnar, fáa íblástur, royndir og menna námsfrøðiliga arbeiðið saman.

Í Runavíkar kommunu vísa tey á, at verkætlanin hevur heitið Life Near Water: People, Animals and Plants og tekur støði í lívinum nær vatni, har bæði menniskju, djór og plantur eru í miðdeplinum.

- Í sambandi við vitjanina fingu gestirnir innlit í, hvussu føroyska náttúran verður brúkt sum ein virkin og týdningarmikil partur av okkara námsfrøðiliga arbeiði við børnunum.

Víst verður á, at gestirnir tóku lut í einum vanligum arbeiðsdegi í Sellanum og Varðanum og fingu harvið eina ítøkiliga fatan av, hvussu vit í gerandisdegnum brúka náttúruna sum námsfrøðiligt læringsrúm.

- Samstundis fingu tey innlit í tey ríkidømi og teir møguleikar, sum náttúran kring okkum bjóðar, og hvussu serliga vælsignað vit eru at hava hesi umhvørvini so nær knýtt at dagliga arbeiðinum.

Í Runavíkar kommunu vísa tey á, at nú í oktober fara trý starvsfólk frá Sellanum og Varðanum til Estlands saman við luttakarum úr hinum samstarvslondunum.

- Endamálið við ferðini er at fáa innlit í estlendska námsfrøðiliga arbeiðið og í, hvussu náttúran verður nýtt sum partur av teirra dagliga virksemi.

Lagt verður aftrat, at í februar heldur samstarvið fram í Lettlandi, og í apríl gongur leiðin til Litava.

- Samstarvsverkætlanin verður eftir ætlan liðug í mai 2027, siga tey í Runavíkar kommunu.