Liðið hjá Gullbrandi í Horni Øregaard og Olafi Bárðarsyni, Sandnes ULF bjargar plássinum í næstbestu norsku fótbóltsdeildini.
Í dag vann Sandnes ULF 3-1 á Åsane í seinasta dystinum í hesum kappingarárinum. Úrslitið merkir, at Sandnes endar fimtaftast í deildini við 33 stigum. Raufoss og Åsane flyta beinleiðis niður í triðbestu deildina, meðan Sogndal má spæla Play Off dystir móti liði úr triðbestu deildini.
Ole Sebastian Sundgot legði Sandnes á odda við einum brotssparki miðskeiðis í fyrra hálvleiki. Beint undan steðginum fekk Sandnes ein vátan vøtt, tá Åsane javnaði til 1-1. Tað vóru bert leiktir tríggir minuttir av seinna hálvleiki, tá Kevin Nilsen Pereira fekk Sandnes á sigurskós aftur.
Olaf kom á vøllin í 65. minutti, og bert fýra minuttir seinni hevði Olaf eina geniala fríspæling, har Ole Sebastian Sundgot tók av og beindi bóltin í netið til 3-1.
Mattias H. Lamhauge var á beinkinum, og eykamálverjin Simo Lampinen-Skaug slapp at verja málið, tá Strømsgodset á útivølli vann 3-2 (2-2) á Stabæk. Strømsgodset hevði longu tryggjað sær uppflyting undan dagsins dysti. Tað lagaði seg so væl hjá Strømsgodset, at Haugesund á heimavølli tapti 2-3 fyri Odd, og tí vinnur liðið hjá Mattiasi deildina við 66 stigum. Haugesund endar á 65 stigum, og flytur eisini upp í bestu deildina.
