Danmark kom aftur á sigurskós í EHF Euro Cup, eftir at tað mikudagin varð til javnleik móti Spania. Hesaferð vunnu danir við níggju málum í einari fullsettari høll í Zürich.
Byrjanin var tó trilvandi. Danska liðið misti nógvar bóltar, og sveisarar tóku av møguleikunum og fylgdu við upp í 7-7. Málini vóru fá í fyrra hálvleiki, men Danmark fór til steðgin á odda 13-9.
Kevin Møller stóð væl í danska málinum, meðan Emil Nielsen fekk ein steðg. Møller bjargaði helvtini av skotunum hjá sveisarum fyri steðgin og helt fram við góðum avriki í seinna hálvleiki.
Tá fekk Danmark eisini betur skil á álopsspælinum. Við seks málum á rað øktu danir upp í 19-9, og sigurin sá út til at gerast sera stórur.
Sveis fekk tó fótað sær aftur og minkaði um munin til 23-17, áðrenn Danmark dró frá aftur seinastu løtuna og vann 33-24.
Simon Pytlick var millum bestu donsku leikararnar og gjørdist toppskjútti í dystinum við tíggju málum. Mathias Gidsel fekk sjey mál, men brendi eisini helvtina av sínum 14 skotroyndum.
Dystirnir í EHF Euro Cup eru liður í fyrireikingunum til HM í Týsklandi í januar. Danmark hevur vunnið seinastu fýra heimsmeistaraheitini og fer til endaspælið sum verjandi heimsmeistari.
Áðrenn HM skal Danmark spæla tveir venjingardystir móti Kekkia í januar.
Kelda: Ritzau
