Týsdagin klokkan 15 - tað er klokkan 19 lokala kasakiska tíð - spælir føroya landsliðið fjórða dystin í hesari Nations League kappingini.
Mótstøðuliðið í bólki 3 í Nations League deild C verður Kasakstan. Vøllurin í Astana hevur graslíkið, og tað verður helst tað einasta heimliga við dystinum hjá okkara leikarum.
Tá liðini hittust á Tórsvølli 26. september endaði dysturin við javnleiki 1-1.
Føroyar hava vunnið tríggjar venjingardystir móti Kasakstan, men hava til góðar at vinna ein kappingardyst á Kasakstan. Har er talan um tveir javnleikir og ein kasakiskan sigur í trimum innanhýsis kappingardystum.
Eftir trý umfør eru leikt er støðan í bólki 3 tann, at Slovakia hevur sjey stig, Moldova hevur fýra stig, Føroyar hava trý stig (fyri tríggjar javnleikir), og Kasakstan hevur eitt stig. Tí er trýstið størst á Kasakstan undan dystinum týsdagin.
Fyrradagin tapti Kasakstan á heimavølli 1-2 fyri Moldova, ið hava í tveimum teimum seinastu dystunum prógvað, at teir eru eitt væl betri lið enn styrkismetingin boðar frá.
Kasakstan-Moldova 1-2 (0-1)
0-1 Nicky Clescenco ('45 )
0-2 Petru Popescu ('50 )
1-2 Nuraly Alip ('64 )
