Hurðin gongur títt í ítróttahúsinum í Sarpugerði, og hon gongur eisini títt í ítróttahúsinum á Svangaskarði.

Í Sarpugerði er ferðslan inn í felagið, og á Svangaskarði er talan um spælarar, sum flyta úr felagnum.

Í kvøld boðar Víkingur frá, at felagið hevur skrivað undir sáttmála við Sebastian Lau Nielsen, sum seinastu fimm árini hevur umboðað B68. Hetta er fjórði spælarin, sum skrivar undir sáttmála við Víking í hesi vikuni. Hinir eru Jónas Prior, Jóhan Josephsen og Martin Johansen.

Sebastian Lau Nielsen hevur sambært FaroeSoccer spælt 120 landskappingardystir í Meistaradeildini og skorað 22 mál. Í kappingini um løgmanssteypið hevur hann spælt 12 dystir og skorað tvey mál.

Sebastian Lau Nielsen er triði spælarin í hesi vikuni, sum spældi við B68 í ár, og sum nú fer at spæla við øðrum felag. Hinir eru Marjus Nón, sum fer at spæla við Skála ÍF og Fríði í Túni Petersen, sum nú fer at spæla við AB.

Í Sebastiani fáa vit ein hartarbeiðandi og orkuríkan leikara, ið fyri tað mesta spælir á framrættaðu plássunum, skrivar Víkingur í kvøld.