Bretska stjórnin fer nú at seta í verk revsitiltøk ímóti tíggju teimum størstu oljuframleiðarunum í Russlandi.

Tað veit tíðindastovan, Reuters at siga í dag.

Sagt verður, at revsitiltøkini eitt nú fara at fevna um skip í russiska skuggaflotanum og kolafeløgum.

Sonevndi russiski skuggaflotin fevnir um ein hóp av eldri skipum, sum Russland brúkar fyri at ganga uttanum altjóða revsitiltøk.

Skipini sigla við russiskari olju - uttan um vesturlendskar reglur og tryggingar.

Emdamálið hjá russum við hesum er at tryggja landinum týdningarmiklar oljuinntøkur, nú landið er í áralongum kríggi við Ukraina.