Hvussu langt er arbeiðið komið at seta aldursmark á sosialar miðlar í Føroyum?

Tað vil Magni Højgaard, løgtingsmaður, hava at vita frá Bárði á Lakjuni, landsstýrismanni í mentamálum. Hann hevur sett landsstýrismanninum ein skrivligan fyrispurning um sosialar miðlar og avmarkingar.

Løgtingsmaðurin spyr eisini, um arbeitt verður við ítøkiligum tiltøkum, og hvørjar sosialar miðlar eitt aldursmark kann fara at fevna um.

Harumframt vil hann vita, um arbeitt verður við einari loysn, til dømis einari app, sum kann vátta aldurin hjá teimum, ið rita inn á sosialar miðlar.

Vísir á svøvn, atburð og lesing

Í viðmerkingunum vísir Magni Højgaard á, at nógv verður tosað um børn og sosialar miðlar.

Hann nevnir millum annað vandan fyri, at børn verða lokkað inn í netverk á netinum og koma í samband við vandamiklar persónar. Eisini vísir hann á umrøðuna av, hvussu óavmarkað atgongd til snildtelefonir og sosialar miðlar kann ávirka binding, atburð og svøvn hjá børnum og ungum.

Løgtingsmaðurin tekur eisini støði í kjakinum um PISA-kanningina. Har eru sosialir miðlar, skíggjar og alnótin nevnd sum viðurskifti, ið kunnu hava við sær, at børn og ung lesa ov lítið, vísir hann á.

Heldur talgilda loysn vera møguliga

Magni Højgaard vísir til Danmarkar, har ein app til at vátta aldurin hjá brúkarum hevur verið umrødd. Endamálið er at forða børnum undir einum ásettum aldursmarki í at rita inn á sosialar miðlar.

Hann heldur, at ein líknandi loysn eigur at vera møgulig í Føroyum, har vit longu hava Vangan og Samleikan.

Samstundis leggur hann dent á, at stóru pallarnir, eitt nú Snapchat og TikTok, mugu samstarva og taka ábyrgd.

Fyrispurningurin varð settur á Løgtingi 15. september.