Vatn, sum í dag rennur út í havið, skal verða ein grønlendsk útflutningsvøra.

Tað er ætlanin hjá felagnum Agrowa, sum hevur fingið loyvi at gagnnýta vatnið Sammisup Tasersua nær Atammik.

Anda Uldum, stjóri, sigur við Sermitsiaq, at málið er at byrja útflutningin í 2027.

Ætlanin er at leiða vatnið gjøgnum rør oman til strondina og pumpa tað umborð á tangaskip, sum skulu sigla tað til keypararnar.

Felagið er sambært stjóranum í samrøðum við marknaðir í Suðurevropa og Miðeystri. Enn er ikki endaliga greitt, hvørjir keypararnir verða.

Vatnið skal fyrst og fremst seljast sum drekkivatn og til dagliga nýtslu. Áhugi er eisini frá landbúnaðinum, sum kann brúka tað til at væta jørðina.

Áðrenn framleiðslan kann byrja, skal ein meting gerast av avleiðingunum fyri náttúru og umhvørvi. Síðan kunnu rør og aðrar neyðugar útgerðir leggjast.

Agrowa samstarvar við Rambøll Grønland um fyrireikingarnar.

Enn er óvist, hvussu nógv arbeiðspláss ætlanin kann skapa, men felagið vónar, at virksemið fer at koma lokaløkinum til góðar.