Bjarni í Selvindi, Helgi H. Hoydal og liðfelagarnir í Kristiansand spældu í kvøld dyst móti Haslum í bestu norsku hondbóltsdeildini.
Við einum frálíkum avriki í seinna hálvleiki vann Kristiansand stórsigur 35-26. Haslum var annars á odda 14-13 í steðginum. Sostatt vann Kristiansand seinni hálvleik 22-12.
Bjarni gjørdist toppskjútti hjá Kristiansand við átta málum. Harumframt legði Bjarni upp til tvey mál. Helgi skoraði trý mál.
Sigurin kom sera væl við hjá Kristiansand, ið nú er næstaftast í deildini við níggju stigum. Fýra stig eru upp til Fjellhammer og Bækkelaget, ið hava 13 stig hvør.
Kristiansand hevur nú fýra stig niður til Viking TIF á aftasta plássinum.
Komandi sunnudag tekur Viking TIF, ið hevur Nicholas Satchwell í hópinum ímóti Kristiansand á heimavølli.