Elbilaframeliðarin Tesla økir umsetningin í triðja ársfjórðingi av 2022, men marknaðurin er ikki nøgdur.
Tilsamans var umsetningurin hjá Tesla í ársfjórðinginum 163 milliardir krónur.
Tað er sambært felagnum met. Tað er eisini ein hækking upp á 56 prosent í mun til sama ársfjórðing í fjør.
Men tað var sambært tíðindastovuni AFP umleið 3.800 millónir dollarar undir tað, sum greinarar høvdu væntað.
Eisini yvirskotið hjá Tesla hækkaði til 25 milliardir rkónur. Tað er millum annað ein munandi vøkstur í veitingini av bilum, sum er orsøk til hækkandi umsetningin, skrivar Tesla í tíðindaskrivi.
Tilsamans lat felagið umleið 344.000 elbilar, og samlaða framleiðslan av bilum kom í ársfjórðinginum upp á 366.000 eindir.
Tað var ein vøkstur í framleiðsluni upp á 54 prosetn í mun til sama ársfjórðing í fjør.
Á marknaðinum eru tey tó vónbrotin av roknskapinum, og Tesla-partabrøv eru fallin í kjalarvørrinum av roknskapinum.
Í roknskapinum verður víst til avbjóðingar við framleiðsluni á verksmiðjum í Berlin og Texas. 
– Umskifti í vørustreymsamskipan og fløskuhálsar í framleiðsluliðunum eru avbjóðingar, sjálvt um tað gongur framár, skrivar felagið.
– Vit halda framvegis, at avmarkingarnar í veitingunum av battaríum er størsta avmarkandi liðurin í marknaðinum fyri elbilar.
Roknað verður við, at stjórin og stovnarin av Tesla, Elon Musk, fer at viðmerkja roknskapin í eini samrøðu við greinarar.
Har verður millum annað eyga hildið við, um felagið heldur fast um málið um at økja talið av veittum bilum við 50 prosentum í ár. Tað skrivar tíðindastovan Reuters.
Nakrir greinarar halda, at eftirspurningurin kann vera við at minka.
Teir halda millum annað, at høgu prísirnir hjá Tesla kann vera ein veikleika í einum altjóða búskapi, sum er raktur av óvissu.
/ritzau/