Hans Jacobsen, sum í dag er 80 ára gamal, hevur verið ímyndin av føroyskum kistusmíði í samfull 46 ár. Tey flestu árini hevur hann havt verkstaðin í egnum kjallara í Heinagøtu í Havn.
- Eg plagi at siga, at eg byrjaði at smíða kistur burtur av í 1974, og tá eg gavst á verkstaðnum hin 15. oktober í fjør, hevði eg smíðað kistur í 46 ár.
Hann sigur, at eftir hesi mongu ár við føroyskum kistusmíði, stongdi hann verkstaðin frá degi til dags. Hann hevði nakrar kistur standandi, og allar vóru ikki lidnar.
- Men, tá dagurin 15. oktober í fjør kom, hevði eg selt mína seinastu kistu, og eg stongdi verkstaðin, sigur hann.
Hans Jacobsen er væl fyri likamliga, og hann heldur, at hann saktans kundi arbeitt nøkur á aftrat.
- Men, vit eru tvey eldri fólk, og konan er illa gongd. Tá eg hevði valið ímillum at passa kisturnar ella í størri mun at hjálpa konuni, valdi eg at gevast á verkstaðnum.
Hann leggur aftrat, at hann og konan klára seg saktans uttan hetta virksemi, sum hevur fylt so nógv í heiminum í Heinagøtu í Havn øll hesi mongu ár.
Í VikuskiftisSosialinum, sum er komin í blaðsølurnar, er stór samrøða við Hans Jacobsen um tíðina sum kistusmiður, og her verður eisini skift orð um ymiskt annað í lívinum hjá honum.
