Tað var stórur dramatikkur, tá ið Undrið FF seinnapartin hevði vitjan av NSÍ, sum arbeiðir við stórari orku fyri at sleppa undan at flyta niður.
Tá ið vanliga leiktíðin var farin í Hoyvík, var støðan 3-2 til NSÍ, og støðan helt sær, inntil stóripinnur var farin fimm ferðir runt aftrat. Tá javnaði Undrið FF. Heimaliðið hevði deyðbólt, og málverjin Petur Meinhard Magnussen fór fram í álopið. Bólturin varð lagdur í brotsteigin, og har var tað Undrið FF málverjin Petur Meinhard Magnussen, sum við høvdinum setti bóltin í málið. 3-3 og eitt stig í part.
Fyrstu løtuna bendi einki á, at NSÍ ikki fór at vinna øll stigini.
Marjus Nón setti hol á longu í 3. minutti, og tríggjar minuttir seinni økti Tehor Korytskyi um munin til 2-0.
Hesa løtuna var tað rættiliga stutt millum málini. Bjarni Brimnes minkaði um munin miðskeiðis í fyrra hálvleiki, og 13 minuttir undan steðginum var tað Ari Langgaard, sum økti um munin til 3-1.
Sjey minuttir undan steðginum umsetti Martin Hjaltalin Dam brotsspark til mál og 3-2.
Sum seinni hálvleikur leið, hevði heimaliðið fleiri møguleikar, og so var tað í síðstu sekundunum, at málverjin hjá Undrið FF skoraði og bjargaði heimaliðnum eitt stig.
Undrið FF er á fjórða plássi við 36 stigum, og NSÍ er næstaftast við 15 stigum.
Hósdagin fer Undrið FF at spæla á útivølli í grannauppgerð ímóti B36, og fríggjadagin fer NSÍ at spæla á útivølli ímóti B71.
