Fyri 10 árum síðan vóru 68 næmingar í serflokkunum, fyri fimm árum síðan 160 næmingar, og hetta skúlaárið eru 275 næmingar í serflokkunum.
Hetta skúlaárið eru 275 næmingar innskrivaðir í 12 serflokkar. Serflokkar eru um alt landið, tveir í Suðuroy, fýra í Havn, tveir í Vágum, ein í Vestmanna, ein við Streymin, ein í Runavík og ein í Klaksvík. Aftrat hesum eru 16 næmingar í Støðini í Runavík og Lopfjølini í Havn, sum eru undirvísingartilboð fyri næmingar, ið fáa heima- og sjúkraundirvísing vegna stóra skúlafráveru.
Fyri 10 árum síðan vóru 68 næmingar í serflokkunum, fyri fimm árum síðan 160 næmingar, og hetta skúlaárið eru 275 næmingar í serflokkunum. Tað vil siga, at seinastu fimm árini eru 115 næmingar fleiri í serflokkunum; samanbera vit við fyri 10 árum síðan, so er tað ein fýrafalding av næmingatalinum í serflokkunum. Sjálvt um talið av næmingum í serflokkum er nógv vaksið, so er enn long bíðitíð eftir at fáa pláss í einum serflokki.
Tað var leingi bert tann eini serflokkurin, sum var skipaður í Gulaskúla undir leiðslu av Sernámi og Venjingarskúlanum. Í 2019 kom kunngerðin “um at skipa serligan skúla ella undirvísingartilboð”. Nýggjasti serflokkurin er Ljósastova, sum er skipað í Skúlanum a Argjahamri. Seinastu trý árini er næmingatalið í Ljósastovu vaksið frá 10 til 15 næmingar.
Í 2007 byrjaði tos um at skipa eitt undirvísingartilboð til næmingar við atferðartrupulleikum, sum høvdu stórar trupulleikar at vera í vanligu floksundirvísingini; tá varð ein hálv millión sett av á fíggjarlógini til at skipa eitt tílíkt tilboð. Seinastu árini, tá teir nógvu serflokkarnir eru skipaðir, er eingin serstøk játtan sett av til endamálið, men hetta er fíggjað við at flyta pengar frá aðrari undirvísing í vanligu flokkunum. Á fíggjarlógini fyri 2026 verða 57 milliónir settar av til serflokkar.
Aftrat serflokkunum er Skúlin á Trøðni, ið er ein serskúli. Í Skúlanum á Trøðni ganga 70 næmingar, so samanlagt ganga 361 næmingar í hesum skúlatilboðunum.
Hetta skrivar Skúlablaðið á netinum. Blaðið hevur í hesum døgum fleiri áhugaverd hagtalstíðindi.
##med2##
