Tað gongur so væl, sum tað ber til við fótbóltinum í Eysturkommunu. Í annaðkvøld fer besta liðið í Gundadal. Tá vera ørindini ímóti B36 at styrkja um trivaliga oddasessin. Í dag var besta kvinnuliðið hjá B36 í Sarpugerði, og gestirnir noyddust suður aftur í Gundadal við 7-0 tapi. Tað ber við sær, at Víkingur er topplið í kvinnudeildini.
Í kvøld vóru teir næstbestu hjá Víkingi í Klaksvík, og teir fóru undir aftur fjørðin við trivaligum 6-0 sigri. Úrslitið ber við sær, at Víkingur nú er topplið í næstbestu deildini við 35 stigum. Tað er eitt stig aftur til bæði B36 og FC Suðuroy.
Hálvleiksstøðan var 3-0. Málini í fyrra hálvleiki skoraðu Martin Klein Joensen í 7. minutti, og Rani Hansen, sum í smáar tíggju minuttir fram ímóti steðginum skoraði tvey mál.
Jarnskorararnir tóku sær av málunum í seinna hálvleiki. Jákup Martin Jarnskor økti um munin til 4-0 í 63. minutti, og minuttin eftir og beinanvegin eftir, at hann varð skiftur inn, varð Fríði Gertsson Jarnskor málskjútti. Hann staðfesti 6-0 sigurin fimm minuttir undan leikloki.
Umframt Martin Klein Joensen vóru tríggir aðrir, sum plaga at vera á listanum hjá besgta liðnum, millum teir fyrstu ellivu hjá Víkingi. Talan var um Signar á Brúnni, sum var á vøllinum í 63. minuttir, og Inga Jonhardsson og Árna Nóa Atlason, sum vóru á vøllinum í fyrra hálvleiki.
Eingin av teimum á KÍ listanum hevur higartil í ár átt nakran leiklut á besta liðnum.
