Nógv nøvn hava verið upp á tal til landsstýrisessirnar hjá Fólkaflokkinum.
Eftir at Havnar Framburðsfelag valdi Sólvit Nolsø, sum er uttan fyri tingmanning og uppstillingarlistan hjá Fólkaflokkinum, gjørdist greitt, at talan fór at verða um fólk uttan fyri tingmannigina, sum skuldu í landsstýrið, fyri at halda Anniku Olsen uttanfyri.
Úr Klaksvík skilja vit, at Alexandra á Dul, stjóri á Klaksvíkar Sjúkrahúsi var upp á tal sum landsstýriskvinna í almannamálum. Eisini tyktist semja at vera um, at Oddmar á Lakjuni, býráðslimur hjá Fólkaflokkinum í Klaksvík, sum skuldi gerast fiskimálaráðaharri.
Tað var greitt, at Norðoyggjar ikki fingu báðar sessirnar, og tí var semja um, at Oddmar á Lakjuni var tann, sum semja var um, og hann var til reiðar – tá bæði Elsebeth Mercedis Gunnleygsdóttur og Beinir Johannesen mótmæltu. Oddmar á Lakjuni hevði verið ein ov stórur kappingarneyti, tí hann hevur politiskar ambitiónir, situr í býráðum og í SEV vegna Klaksvíkar kommunu.
Tí fall valið á Árna Skaale, sum er kendur vinnulívsmaður í Klaksvík, og sum – í øllum førum ikki higartil – hevur havt politiskar ambitiónir.