Húsini hava í fleiri umførum verið advokatskrivstova og bústaðarhús. Advokat Helge G. Simons seldi húsini til Børge Hustedt Andersen, advokat, í 1936. Hann húsaðist har til hann fór av landinum í 1949.

Húsini hava síðan verið brúkt til mangt og hvat. Var kostskúli hjá nonnunum seinast í 50'unum og síðan millumskúli, áðrenn tey blivu vøggustova.

Húsini liggja væl fyri. Stutt er til Viðarlundina, Grasagarð, vøllirnar í Gundadali, og býarbussurin steðgar beint við. Harumframt er ein av bestu gørðunum í býnum á staðnum.

Søgan um Stella Maris vøggustovuna gongur aftur til 1958, tá nonnurnar settu á stovn ta fyrstu vøggustovuna í landinum.

Í byrjanini helt vøggustovan til í tveimum skúlastovum á Sankta Frans Skúla, beint hinumegin vegin, men í 1965 flutti vøggustovan niðan til betri og rúmligari umstøður í Stella Maris.

Nú skal byggjast nýggjur framhaldsskúla til Sankta Frans skúla á staðnum. Tað verður byggifyritøkan HVT, sum skal gera arbeiðið fyri kommununa – arbeiðið, sum nú er farið í gongd. Arbeiðið kostar 28,5 milliónir krónur.

Við hesum fer Sankta Frans skúli at hava næmingar úr forskúla til 9. flokk, ið hevur verið stórt ynski hjá skúlanum í mong ár. Í skúlanum verða seks skúlastovur, umframt serhøli og fakhøli, eins og starvsfólkaumstøður og felags uppihald.

Bygningurin er umleið 1100 fermetrar og sambært tíðarætlanini verður hádeildin tikin í nýtslu til skúlaárið 2024/25.