Heilsustýrið gjørdi seinasta heyst eina kanning, “Hvussu hevur tú tað?” Henda kanningin vísti, at føroyingar roykja nógv meira enn aðrir norðurlendingar.
Í løglistanum hjá landsstýrinum verður sagt, at aðalmálið við at dagføra lóggávuna um royking og at skipa fyri átøkum á økinum er at tryggja øllum rættin at liva og virka í roykfríum umhvørvi og at víðka rásarúmið hjá teimum, sum ikki roykja. 
Tað verður serliga hugsað um børnini og tey ungu. Endamálið er at betra fólkaheilsuna við at minka heilsuskaðar og andlát vegna royking og at minka nikotinnýtsluna. 
Arbeiðið við at dagføra lóggávuna tekur støði í galdandi roykilóg, tubbakssáttmálanum hjá WHO og tubbaksdirektivinum hjá ES. 
Arbeitt verður eisini við at skipa fyribyrgjandi tiltøk, so fólk ikki fara at roykja. Málið er, at árgangirnir hjá teimum sum eru fødd eftir 2010 eru roykfríir og ikki nýta aðrar tubbaks- ella nikotinvørur. 
Harumframt verður eisini arbeitt við tilboðum um stuðul at leggja av til tey, ið vilja gevast at roykja ella brúka aðrar nikotin- og tubbaksvørur. 
Lógaruppskotið verður eftir ætlan lagt fyri Løgtingið í hesari tingsetuni.