Teir flestu migrantarnir komu úr londum í Vesturafrika, skrivar Reuters. Tólv av bátunum komu til El Hierro, ein av minstu oyggjunum í oyggjabólkinum. Hinir báðir komu til ávikavist Gran Canaria og Tenerife.

Í einum av bátunum, sum komu til El Hierro, vóru 240 fólk, teirra millum 12 kvinnur og 36 børn. Tey flestu umborð vóru úr Senegal, Gambia og Guinea.

Spanska tíðindastovan EFE skrivar við tilvísing til sjóbjargingartænastuna, at talið í gjár var tað hægsta á einum degi síðani 2020.

Trýst á smáu oyggjarnar

Frá januar til endan av oktober komu 5,5 prosent færri migrantar til Kanariuoyggjarnar enn sama tíðarskeið í fjør, vísa tøl frá sponsku stjórnini. Talið er tó vaksið nógv seinasta mánaðin, og tað hevur lagt trýst á myndugleikarnar, serliga á smærru og fólkafátøku oyggjunum.

Leiðin um Atlantshavið úr Vesturafrika til Kanariuoyggjarnar verður mett at vera ein av teimum vandamestu farleiðunum hjá migrantum. Á hvørjum ári royna fleiri túsund fólk at náa sponskum øki í yvirfyltum bátum, hóast leiðin er long, sjógvurin kann vera ringur og streymurin harður.

Fyrr í november lótu í minsta lagi 34 fólk lív, tá ein bátur við migrantum sakk úti fyri útnyrðingsstrondini í Senegal.

/ritzau/Reuters/